一名玩左OLG十幾年既玩家有野要講 (長文慎入)

icacc

我都係由龍族0.68開始接觸Online game,  好同意樓主所講而家既所謂online game的確係垃圾.

我覺得其根本原因在於而家出既game過於照顧玩家以及劇情副本, 從而削弱了玩家的自由度以及玩家之間的互動性.

我所指過於照顧玩家就是所謂的掛機系統以及導航系統. 雖然明白到遊戲代理為了令玩家更方便更易上手而推出掛機導航系統. 不過, 掛機導航卻令玩家大副降低投入程度, 而且玩家亦失去探索冒險既樂趣!!

舉個例子講, 以前我地玩game, 由於咩提示都冇, 邊度打怪, 咩地方安全咩地方危險, 全部都係靠自己探索或者問人, 去其他地方就好似要去探險咁, 準備充足的補給品, 而且都係靠自己行去, 要時時刻刻都注意身邊的危險, 同好朋友一齊經歷各種危險, 記得邊條路安全, 係邊度打王, 收獲, 分享情報等等, 最重要就係要有一個有經驗或者才智過人的領袖帶路, 一步步前進, 呢D先係遊戲既樂趣!!!! 反觀而家D垃圾game呢? 跟本就只睇住說明書拼模型, 只要跟住指示人人都可以做到, 打王副本旁邊就有入口, 根本唔駛搵, 日日淨係刷副本再唔係就掛機賣野. 試問咁樣既遊戲玩家點會投入, 遊戲點會耐玩? 呢D系統搞到而家D細路下下都怕困難, 冇耐性冇恆心, 只想食快餐, 唔駛同人交流, 更加造成惡性循環!!

再講, 而家D game都太注重劇情, 只要跟住劇情做任就可升LV變強. 個個都係度做埋一式一樣任務, 自由度低!! 分高下只有一個方法, 就係睇你有冇HKD. 裝備全部都透過做任取得, 個個都一樣, 同樣有錢就可以強化. 試問咁樣有咩高低特色可言, 個個就好似係工廠生產一樣. 我地以前打機都冇咩任務, 至少肯定唔係靠任務升LV, 拎基本裝備. 以前升LV都係靠自己慢慢打怪努力, 角色強唔強唔係靠有冇HKD, 而係靠操縱技巧, 技巧靠平時升LV同PK得返黎. 基本裝備同NPC買, 強既裝備就靠打王或者自己生產, 或者同玩家買, 全部都唔靠HKD.

最重要一點, 而家D game太缺乏互動性, 所有野都可以自動, 行路搵路自動, 賣野自動, 跟本唔駛同其他人交流. 組隊就來來去去都係自己友, 一係就互相利用, 只為升LV說話都唔多句. 咩互相幫忙帶新手升LV呢D已不再存在. 以前我地打機有國戰, 交易組隊全手動, 國家之間罵戰, 玩家之間討價還價, 公會開片, 踩場, 死左要搵祭司, 係度叫賣, 搵人組隊等等, 互動交流既機會好多, 有時雖然會唔和諧, 不過大家心裡仲係好快樂好投入的.

講咁多其實雖然只係打機, 不過卻是陪伴我地成長的元素之一. 縱使唔係咩偉大成熟, 但至少我可以大聲講, online game教識我點樣做每件事要投入要全心全意, 教識我點樣同人相處, 討價還價講需求定律, 或者世途險惡戴眼識人, 理財之道. 最重要一點係要拎個心出黎, 無論對人也好對事也好. 呢D係我從online game中學到既野. 但係而家D Game可以帶俾我地新一代乜野? 消費主義之道? 方便之門免費午餐之道? 還是係有錢大晒之道?

而家我地呢D 玩龍族, 神話, 玩魔力, RO, 石器, 寵物王, 幸福等等長大的人好多都已經投身社會, 冇左接觸online game了. 一方面沒時間, 而且實在冇game值得玩. 但眼見現今online game到如此地步, 著實心裡有點不好受, 因此在這刻抒發一下, 畢竟online game也算是我學習做人既母校.